काठमाडौं ,३१ जेठ। प्रधानमन्त्री केपी शर्मा ओलीले यस वर्षको एसईई नतिजामा सुधार आउने बताउनुभएको छ ।
शुक्रबार काभ्रको धुलिखेलस्थित काठमाडौ विश्वविद्यालयको ३० औँ दीक्षान्त समारोहलाई सम्बोधन गर्दै प्रधानमन्त्री ओलीले गत वर्षको नतिजामा ४८ प्रतिशत विद्यार्थी उत्तीर्ण हुनु नाजुक अवस्था भएको भन्दै यस बर्ष नतिजामा सुधार आउने बताउनुभएको हो । यस वर्ष ६० देखि ६५ प्रतिशत विद्यार्थी उत्तीर्ण हुने सरकारले अनुमान गरेको उहाले बताउनुभयो ।
प्रधानमन्त्री ओलीले एसइईमा सुधारसँगै सम्रग शिक्षा क्षेत्रको विकासको लागि सरकार सचेत रहेको धारणा राख्नुभयो । त्यस्तै उहाले अध्ययन कहिल्यै पूरा नहुने भएकाले आफूूले पाएको ज्ञानलाई व्यहाहारमा उतार्दै आइपरेका नयाँ नयाँ चुनौतीको मौलिक ढङ्गले समाधान गर्दै अगाडि बढ्न दीक्षित विद्यार्थीलाई आग्रह गर्नुभयो । नेपाल कहिल्यै कुनै मुलुकको अधिनस्थ नरहेको र कहिल्यै नरहने बताउँदै उहाँले नेपाल सानो राष्ट्र भए पनि स्वाधिनताका साथ बसेको स्पष्ट गर्नुभयो ।
दिक्षान्त समारोहमा विश्वविद्यालयका विभिन्न ६ वटा स्कुलबाट १,१२९ जना विद्यार्थी दीक्षित भएको काठमाडौं विश्वविद्यालयका उपकुलपति प्रा.डा.अच्युत वाग्लेले बताउनुभयो । उहाँका अनुसार, दिक्षित हुने विद्यार्थीमध्ये महिला विद्यार्थी ५५४ जना र पुरुष ५७५ जना रहेका छन् । समारोहमा उत्कृष्ट नजिता हासिल गर्ने ७ जना विद्यार्थीहरूलाई ओलीले प्रधानमन्त्री स्वर्ण पदक प्रदान गर्नुभएको थियो । हालसम्म ४७ हजार ८३१ जना विद्यार्थी दीक्षित भइसकेको विश्वविद्यालयले जनाएको छ ।
